L'Ostal Bodon en qualques datas

1999

La Comuna de Crespinh, de mercé lo vam del seu jove conse Andriu At, decidís de crompar la bòria mairala de Joan Bodon, dins l'amira de ne far quicòm a l'entorn de la memòria de l'escrivan e de la lenga occitana.

2002

Lo radobament de la teulada vièlha permet de salvar lo bastiment e de dubrir l'ostal als vistalhaires pendent las jornadas europencas del patrimòni.

2003

La Comunautat de Comunas de Nòvacela s'interessa al projècte Ostal Bodon per son potencial al nivèl cultural e toristic.

2004

Annada de soscadissa... L'ostal es tornarmai dubèrt - en l'estat - pel public de las jornadas europencas del patrimòni. A l'escasença d'aquelas jornadas, Andriu At endeven per còp d'astre Robèrt Martí, vengut legir qualque tròces de l'òbra de Joan Bodon sul balet de l'ostal. Li demanda de préner part al grop que trabalha sul projècte.

2005

Lo 24 d'abrial, pausa solemne de la primièira pèira per lo sénher Joan Puèg, president del Conselh General de Roergue, en preséncia de Joanina Bodon, filha ainada de l'autor.

2006

De mercé lo vam de Robèrt Martí e de la sia molhèr Josiana, amb lo sosten de la Comuna de Crespinh e de la Comunautat de Comunas de Nòvacela bailejada per Anna Blanc, es margada l'associacion de prefiguracion de l'Ostal Joan Bodon. Pren a prètzfach de realizar un luòc cultural occitan e de n'assegurar la gestion.

2007 - 2009

Lo projècte Ostal Bodon es mes en òbra. La bastenda es radobada de fons a cima, del fornial duscas al trast. La scenografia prepausada per l'artiste Bernat Cauhapè es retenguda. La Comuna de Crespinh, La Comunautat de Comunas de Nòvacela, lo Departament d'Avairon, la Region Miègjorn-Pirinèus e la Comunautat Europenca asseguran l'investiment financièr.

2010

L'associacion cambia de nom e ven associacion Ostal Joan Bodon. Signa un balh de logacion e un contracte d'objectius amb la C.C.N. de Nòvacela per la gestion del centre.

2010 - Lo 22 de mai

L'Ostal Joan Bodon es oficialament inaugurat pel president del Conselh General Joan-Claudi Luche. Lo conse Andriu At, tot encordelat de blau blanc roge, acaba son parladís per : « Visca Bodon, visca Crespinh, e visca Occitània ! ».

2011

La Federacion Nacionala dels Ostals d'Escrivan dubrís pel primièr còp sas pòrtas a un autor qu'es pas de lenga franchimanda. Jiròni Vialaret, primièr responsable de l'Ostal Joan Bodon, s'en va. Arribada de Lilian Olivier, actual responsable de l'estructura.

Dempuèi 2014

Zélie Théron e Viviane Cayssials asseguran l'acuèlh e las visitas de l'Ostal Joan Bodon.

2014

Creacion de l'associacion "Los Amics de l'Ostal Joan Bodon" qu'a per tòca de fargar la programacion culturala cada annada a l'Ostal Joan Bodon (coma a la debuta del mes agost lo festenal Biaissut)

2015

Jérôme Vialaret es lo president novèl de l'associacion Ostal Joan Bodon

2016 / 2017

Creacion e difusion de l'espectacle "Lo Conte de la Montanha Negra", tirat dels Contes del Drac de Joan Bodon